জীৱনটোৰ সমান বিশাল – অনুপমা বসুমতাৰী

জীৱনটোৰ সমান বিশাল – অনুপমা বসুমতাৰী

জীৱনটোৰ সমান বিশাল – অনুপমা বসুমতাৰী

by September 17, 2017 2 comments

অকলশৰে জন্মিছিলোঁ এদিন
জীৱনজুৰি পাৰ কৰিলোঁ
অকলশৰীয়া জীৱন

তুমিয়েই কৈছিলা
জন্মতো আছিলোঁ মই অকলশৰীয়া
জীৱনতো মই অকলশৰীয়া

তুমিতো নাজানা
মই তোমাক ভালপোৱা কথাষাৰ
মোৰ একাকীত্বৰ দৰেই সত্য

তুমি মোৰ কাষলৈ আহাই বা নাহা
মই তোমাক ভাল পাই থাকিম
জীৱনটো থাকে মানে

মই জানো
ব’হাগৰ বৰষুণজাকৰ দৰে
তুমি নামি আহিবা মোৰ পৃথিৱীলৈ

বসন্তৰ ফুলবোৰৰ দৰে
ফুলি থাকিবা
মোৰ ভাৱনাৰ ফুলনিত

পৃথিৱীয়ে তোমাক
দেখকেই বা নেদেখক
তোমাৰ মৰমৰ উপস্থিতি
মোৰ উশাহে নিশাহে
আছে বিয়পি
আবেগ অনুভৱে
আবৰি আছে মোক
বতাহৰ মৃদু পৰশ হৈ

মই অকলশৰেই থাকিম দিয়া
কাৰণ হৃদয়ৰ বাহিৰে-ভিতৰে
উছাহ হৈ আছে তোমাৰ ভালপোৱা

তুমি আহিলেও
তুমি নাহিলেও
তোমাক দেখিলেও
তোমাক নেদেখিলেও
ধাননি কঁপাই ঢৌ খেলি যোৱা
বতাহজাকৰ দৰে
জীৱনৰ সেউজীয়াত
অনুভৱ কৰি থাকিম
তোমাৰ ভালপোৱা

তোমাৰ ভালপোৱাৰ বিস্তৃতি
জীৱনটোৰ সমান বিশাল

■■■

Comments

2 Comments so far

Jump into a conversation
  1. prabin
    #1 prabin 19 September, 2017, 15:27

    ভাল লাগিল..

  2. prabin
    #2 prabin 19 September, 2017, 15:28

    সাৱলীল

Your data will be safe!Your e-mail address will not be published. Also other data will not be shared with third person.