হে জনগণ! (নিবিড় স্বপ্নম)

হে জনগণ !

  • নিবিড় স্বপ্নম

 

ক্ষমতা, দুৰ্নীতি, শোষণ, নিষ্পেষণ
আৰু বহু বিশেষণ,
দুখীয়াৰ আবেগমুঠি হাতৰ তলুৱাত লৈ
অলৌগুটিলৌগুটি খেলা
তেজপিয়াবোৰে কৰিছে নিৰ্বাচনী সমীকৰণ
এখন অঘোষিত যুদ্ধৰ আখৰাত
পংকিলময় গণতন্ত্রৰ ৰণাংগ,
বোকা ছটিওৱাৰ সংগ্ৰামত
কেৱল শুনো প্ৰতিশ্ৰুতিৰ আস্ফালন৷
গেলি গেলি ঘাঁ হয় সৰ্বহাৰাৰ খবোৰ
কুম্ভকৰ্ণ কবিৰাজ নিদ্ৰামগ্ন,
কৃষকৰ চিৰাল ফাঁটমেলা বুকুবোৰলৈ
কাৰো ভ্ৰূক্ষেপেই নাই,
কেৱল অভিপ্সা আৰোহ
সিহঁতে নুশুনে
পৰিবৰ্তন বিচৰা শ্লোগানবোৰ
গাই যায়, শুনি যাওঁ
প্ৰতিশ্ৰুতিৰ যে গীত সুমধুৰ
নিতৌ আৰ্বিভা এটি সমস্যাৰ
সমাধানৰ সূত্ৰ কোনেবা বিচাৰে,
বাদ বিসম্বাদৰ ৰাজনীতিত
জনতাইতো বলি হৈছে !
হে জনগণ !
কোনে কয় আমি দুৰ্বল নিষ্পেষিত
সংকটকালত আমিয়েই জনাৰ্দন৷
ৰাজনীতিৰ লেতেৰা বজাৰত
যদি চলাব নিদিওঁ
আমাৰ বিবেকৰ দৰদাম,
কোনে আমাক হিব পাৰে
আমি জনতা মহা বলবান৷

 

 

Subscribe
Notify of
0 Comments
Inline Feedbacks
View all comments