ৰঙানদী (প্রতুল কুমাৰ ভাৰধৰা)

ৰঙানদী

প্রতুল কুমাৰ ভাৰধৰা

ৰঙানদী,

তই বৰ নিষ্ঠুৰ অ’,
তোৰ নিষ্ঠুৰতাৰ হাঁতোৰাত
সর্বস্বান্ত মই ।

মোৰ সেউজীয়া শস্যডৰাত
তোৰ অনাহুত উপস্থিতিয়ে
থপিয়াই নিলে
বুকুৰ একঠা সপোন ।

খৰালিৰ দৰে তই যদি
শান্ত হৈ থাকিলিহেতেন,
আজি ঘৰ গচকালোঁহেতেন
মোৰ লখিমীজনীক ।

ৰঙানদী
তই থমকি ৰ’,
নেদেখুৱাবি আৰু
তোৰ তাণ্ডৱ নৃ্ত্য ।
তোৰ বাৰু উন্মাদনাৰ শেষ ক’ত ?
কোনে নিৰ্ধাৰন কৰিব ক’,
পৰা হ’লে তোকো বন্দী কৰি থলোঁহেঁতেন,
তেজপুৰৰ পগলা ফাতেকত ।

মাত্র তোৰ বাবেই
মই আজি নিঃস্ব আৰু
এটা বাটৰ ভিকহু ।

ৰঙানদী,
তই বৰ নিষ্ঠুৰ অ’ ।

———————-

 

Subscribe
Notify of
0 Comments
Inline Feedbacks
View all comments
কপি নকৰিব, অনুগ্ৰহ কৰি লিংকটো বিলাই দিয়ক