বিদেশত দীপাৱলী, কেইজনমান বাংলাদেশী বন্ধু আৰু আমাৰ ভূপেন দা (-পংকজ বৰা)

পৃথিৱীৰ বিভিন্ন দেশৰ হাজাৰ হাজাৰ(প্ৰায় ২৫ হাজাৰ) ছাত্ৰ-ছাত্ৰীয়ে ঠাঁহ খায় থকা নৰৱে দেশৰ শিক্ষা আৰু প্ৰযুক্তিৰ প্ৰানকেন্দ্ৰ, ট্ৰনধেইম এখন যৌৱনময় চহৰ৷ ইয়াত থকা ভাৰতীয় ছাত্ৰ-ছাত্ৰী সকলৰ লগতে স্থায়ী ভাৰতীয় বাসিন্দা সকলোৰে উমৈহতীয়া সংস্থা ‘ইণ্ডিয়ান ষ্টুডেন্টছ ফ’ৰাম’৷ ই ভাৰতীয় সকলৰ মিলা-মেচা কৰাৰ এখন মঞ্চ হোৱাৰ উপৰিও ভাৰতীয় সংস্কৃতি, আদৰ্শ আন্তঃৰাষ্ট্ৰীয় প্ৰেক্ষাপটত দাঙি ধৰি বন্ধুত্বমূলক সদ্ভাৱ বৃদ্ধি কৰা ইয়াৰ উদ্দেশ্যেৰে গঠিত এক সংস্থা৷ আজি বহু বছৰ ধৰি ভাৰতীয় সকলে ট্ৰনধেইমত বিভিন্ন ভাৰতীয় উৎসৱ যেনে হোলি, দীপাৱলী, ভাৰতীয় খাদ্য আৰু বোলছবি মহোৎসৱ, বলিউদ নৃত্য উৎসৱ, ভাৰতীয় স্বাধীনতা দিৱস, গান্ধী জয়ন্তী, আদি পালন কৰি আহিছে৷ যোৱা বছৰ সপ্তাহ যোৰ কাৰ্য্যসূচীৰে ভাৰত-চৰকাৰ আৰু নৰৱে চৰকাৰৰ পৃষ্ঠপোষকতাত India-NTNU সপ্তাহ পালন কৰা হয়, য’ত সমগ্ৰ সপ্তাহ ধৰি ভাৰতৰ বিভিন্ন শিক্ষাবিদ, সংগীতজ্ঞ, বিভিন্ন বিষয়ৰ বিশেষজ্ঞ আদিয়ে ট্ৰনধেইম ভ্ৰমন কৰিছিল৷ চতৰ্ুদিশে কেৱল ভাৰতীয় ত্ৰিৰংগা, ভাৰতীয় খাদ্য, ভাৰতীয় সংগীত, ভাৰতীয় গোন্ধ৷ তাৰ পিছৰে পৰা ভাৰতীয় সকলৰ প্ৰতি ইয়াৰ ৰাইজৰ আদৰ, সন্মান আৰু বহুগুণে বৃদ্ধি পাইছে৷

আনকেইবছৰৰ দৰে এইবাৰো ১০-১১-১২ তাৰিখে নৰৱেৰ ট্ৰনধেইম নগৰীত ইণ্ডিয়ান ষ্টুডেন্টছ ফ’ৰামৰ সৌজন্যত দীপাৱলী উদযাপন কৰা হৈছিল৷ এইবাৰ অংশগ্ৰহনকাৰীৰ সংখ্যা যোৱাবাৰতকৈ বেছিয়েই আছিল (প্ৰায় ৫০০), যাৰ ভিতৰত ২০০ মান বিভিন্ন দেশৰ অভাৰতীয় অতিথি৷ হয়টো যোৱাবছৰ হৈ যোৱা India-NTNU সপ্তাহৰ প্ৰভাৱ৷ মই ২০০৯ চনত ইণ্ডিয়ান ষ্টুডেন্টছ ফ’ৰামৰ সভাপতি আছিলো আৰু লগতে সেইবাৰ দিপাৱলীৰ সাংষ্কৃতিক অনুস্থানত ভূপেন দাৰ ‘মানুহে মানুহৰ বাবে’ আৰু ‘বুকু হম্ হম্ কৰে’ গান দুটা হিন্দী, বাংলা আৰু অসমীয়া ভাষাত পৰিৱেশন কৰিছিলোঁ( আচলতে গোৱাৰ চেষ্টা কৰিছিলো)৷ মূল উদ্দেশ্য আছিল অসমক, ভূপেন দাৰ জড়িয়তে দৰ্শক সকলক পৰিচয় কৰাই দিয়া৷ মই গান দুটাৰ ইংৰাজী তৰ্জমা পাৱাৰ পইন্টত লিখি দিছিলো যাতে ৰাইজে পঢ়ি ভাৱাৰ্থ বুজি পাব পাৰে ৷ মোৰ অপেশাদাৰী কণ্ঠত যে অলপো আকৃষ্ট নহ’ব সেই বিষয়ে মোৰ সন্দেহ নাছিল৷ ভূপেন দাৰ তেতিয়া অসুখ আছিল৷ মই ভূপেন দাৰ জীৱন আৰু কৃতিৰ বিষয়ে ৫ খন শ্লাইদ প্ৰদৰ্শন কৰি চিকিৎসালয়ত থকা ভূপেন দাৰ আশু আৰোগ্য কামনাৰ বাবে উপস্থিত ৰাইজক এক মিনিট প্ৰাৰ্থনা কৰিবলৈ কোৱা মাত্ৰকে সকলোৱে সহযোগ কৰিছিল৷

এইবাৰ মোৰ কৰ্মব্যস্ততাৰ হেতা দীপাৱলীৰ আয়োজনত বিশেষ সক্ৰিয় ভাৱ অংশগ্ৰহন কৰিব পৰা নাচিলোঁ, সেয়ে সাধাৰণ দৰ্শক হিচাপে অনুস্থানলৈ গ’লো৷ এইবাৰ আয়োজক ল’ৰা-ছোৱালী কেইজন যথেষ্ট কৰ্মপটু৷ সকলোবোৰ সুবন্দোবস্ত কৰি ৰাখিছে৷ আগতীয়া ভাৱে ইন্টাৰনেট যোগে টিকেট বিক্ৰী, খাদ্যৰ সুব্যৱস্থা দেখি ভাল লাগিল৷ দিনৰ ভাগত মইও অৱশ্যে মইও ৰন্ধা-মেলা কৰাত সহায় কৰি দিছিলোগে৷ ইয়াত পৰিৱেশন কৰা খাদ্য সমূহ ৰাইজৰ স্বেচ্ছাসেৱাৰে প্ৰস্তুত কৰা হয়৷ অনুস্থানলৈ ট্ৰ’নধেইমৰ মেয়ৰ, ট্ৰ’নধেইমস্থ ভাৰতীয় উচ্চায়ুক্ত আদিৰ লগতে বিভিন্ন দেশৰ, বিভিন্ন বয়সৰ ব্যক্তি আহিছিল৷ এইবাৰ অনুস্থানত বিভিন্ন ভাৰতীয় নৃত্য-গীত আদিৰ লগতে পাকিস্তান, নেপাল আৰু বাংলাদেশৰ একোটাকৈ দলক পৰিৱেশনৰ বাবে নিমন্ত্ৰণ জনাইছিল৷ পাকিস্তানী দলটোৱে সুন্দৰ শ্বায়েৰী পৰিৱেশন কৰিলে৷ নেপালী দলটোৱে আমাৰ হুঁচৰিৰ নিচিনা এটা দলীয় নৃত্য পৰিৱেশন কৰিলে য’ত দিপাৱলীৰ সময়ত ঘৰে ঘৰে গৈ গৃহস্থক আশীৰ্বাদ দিয়া হয়৷ এইবাৰ আহিল বাংলাদেশৰ দলটো৷ ইয়াৰ পিচতে মোৰ বাবে এক বিস্ময়কৰ অভিজ্ঞতা৷ তিনিজনীয়া দলটোৰ এজনৰ হাতত গীতাৰ৷ তেঁওলোকে গীত পৰিৱেশন কৰিব৷ এজনে মাইক্ৰ’ফোনটো হাতত ল’লে৷ তাৰ পিছত ক’লে ডঃ ভূপেন হাজৰিকাৰ বিষয়ে চমুকে দুআষাৰ ক’লে আৰু ক’লে যে তাঁও ভাৰতৰ অসম নামৰ ৰাজ্যৰ বিখ্যাত সংগীতজ্ঞ, মানৱ দৰদী শিল্পী আৰু বাংলাদেশতো সমানেই জনপ্ৰিয়৷ তেখেতেৰ মৃত্যুত ভাৰতবাসীৰ লগতে বাংলাদেশ বাসী মৰ্মাহত৷ তেখেতৰ স্মৃতিত তেঁওলোকে ভূপেন দাৰ এটা অসমীয়া গানৰ বাংলাৰূপ পৰিৱেশন কৰিব৷ লগে লগে গাই গ’ল ‘বুকু হম্ হম্ কৰে গানটোৰ’ বাংলা ৰূপান্তৰ৷ বিমুগ্ধ ভাৱে চাই ৰ’লো মই৷ গানৰ শব্ধ বুজি নোপোৱা সকলেও গানৰ সুৰ আৰু লহৰতেই হাত চাপৰি বজালে৷ গানৰ সুৰত দুই এঠাইত অলপ ভুল কৰিছিল৷ সেইখিনি সামান্য কথা৷ কিছু আবেগবিহ্বল হৈ পৰিছিলো মূহুৰ্ত্বৰ বাবে৷ মঞ্চ পৰা নামি অহাৰ পিচত বাংলাদেশী বন্ধুকেইজন সৈয়ে কৰমৰ্দন কৰি আন্তৰিক ধন্যবাদ জ্ঞাপন কৰিলোঁ৷

এইয়াই ভূপেন দা৷ ৰাজনৈতিক, ভৌগোলিক পৰিসীমা নেওচি বিশ্বজনতাৰ হিয়াঁত ঠাই পাব পৰা সকলোৰে ‘আমাৰ ভূপেন দা’৷