সপ্তম খণ্ড: গজেন্দ্ৰ উপাখ্যান
৷৷ সপ্তম খণ্ড৷৷
৷৷ গজেন্দ্ৰ উপাখ্যান ৷৷
৷৷ প্ৰথম কীৰ্ত্তন৷৷
ঘোষা৷৷
ৰাম ৰাম ৰাম৷ হৰি ৰাম ৰাম৷৷৩৯৷৷
পদ৷৷
ৰাজাক সাদৰি মুনি বুলিলা বচন৷
শুনা পৰীক্ষিত কুৰুকুলেৰ নন্দন৷৷
পৰম মধুৰ মাধৱৰ গুণচয়৷
শুনা সাৱধানে হৌক পাপৰ প্ৰলয়৷৷৪৭৩৷৷
ক্ষীৰ সাগৰৰ মাজে ত্ৰিকূট পৰ্ব্বত৷
প্ৰকাশন্তে আছে তিনি লোকত বেকত৷৷
সুৱৰ্ণ ৰজত লোহা জ্বলৈ তিনি শৃঙ্গ৷
চক্ষুত চমক লাগৈ দেখিতে বিৰিঙ্গ৷৷৪৭৪৷৷
আনো যত শৃঙ্গ ৰত্নে কৰৈ তিৰিমিৰি৷
দশোদিশ প্ৰকাশিয়া শৌভৈ শুক্লগিৰি৷৷
অযুত যোজন জুৰি জ্বলৈ গিৰিবৰ৷
উছিত দেখিয় দশ হাজাৰ প্ৰহৰ৷৷৪৭৫৷৷
ক্ষীৰ সাগৰৰ ঢৌ চৌভিতি উথলে৷
পখালে পৰ্ব্বত সুশীতল দুগ্ধজলে৷৷
থানে থানে আছে ভূমি অনেক উদ্যান৷
ফুলে জকমক গন্ধে নাহিকে সমান৷৷৪৭৬৷৷
নদী নদ অশেষ বিশেষ সৰোবৰ৷
স্ফটিক নিৰ্ম্মল জল দেখি মনোহৰ৷৷
বিদ্যাধৰীসৱে তাতে নামি কৰৈ স্নান৷
পখালে শৰীৰ বৱৈ সুগন্ধিত ঘ্ৰাণ৷৷৪৭৭৷৷
পৰম আমোদ গন্ধ উথলে সদায়৷
দশোদিশ জুৰি তাৰ বায়ু বহি যায়৷৷
দেখি সুশোভন বৰুণৰ৫০ উপবনে৷
যাত নিতে ক্রীড়ে দেৱ দিৱ্য নাৰীগণে৷৷৪৭৮৷৷
শাল তাল তমাল মন্দাৰ পাৰিজাত৷
চম্পক অশোক আনো পুষ্প অসংখ্যাত৷৷
আম জাম লেবু জৰা জামীৰ খাজুৰি৷
বেল নাৰিকল তাল তাম্বূল পাকড়ি৷৷৪৭৯৷৷
অগৰু চন্দন পদ্ম সৰল সোণাৰু৷
আনো যত তৰুতৃণ সৱে কল্পতৰু৷৷
ছয় ঋতু এক কালে বসন্ত উদয়৷
ভ্ৰমৰে গুঞ্জৰে কুলি পঞ্চম পূৰয়৷৷৪৮০৷৷
বহয় মলয়া বায়ু আমোদিত মন৷
নৃত্য গীত কৰৈ তৈতে অপেস্বৰাগণ৷৷
হৰি গুণ গীত গাৱৈ গন্ধৰ্ব্ব কিন্নৰে৷
পাপ দূৰ হৌক হৰি বোলা নিৰন্তৰে৷৷৪৮১৷৷
৷৷ দ্বিতীয় কীৰ্ত্তন৷৷
ঘোষা৷৷
ৰাম দামোদৰ হৰে৷
সেৱকে কাতৰ কৰে৷৷৪০৷৷
পদ৷৷
বনৰ সিটো বিতোপন নাম৷
কহিতে যাহাৰ নাহি উপাম৷৷
তাহাৰ মাজে সৰোৱৰ এক৷
সাগৰ সঙ্কাশ দেখি প্ৰত্যেক৷৷৪৮২৷৷
সৱৰ্ণময় পদ্ম আছে জুড়ি৷
ভ্ৰমৰে মধু পিয়ৈ তাতে পৰি৷৷
ৰাজহংস আদি যতেক পক্ষী৷
পৰি পৰি থাকৈ নযায় উপেক্ষি৷৷৪৮৩৷৷
কুমুদ ইন্দু উতপল ফুল৷
ফুলি আছে গন্ধে নাহিকে তুল৷৷
চৌভিতি বেঢ়ি আছৈ তৰুবনে৫১৷
কহিবে নাম তাৰ কোনজনে৷৷৪৮৪৷৷
কদম্ব ৰঘু নাগেশ্বৰ গাছে৷
ফুলে ঝকমক বেঢ়িয়া আছে৷৷
মালতী মধাই জাঁই যূতি যত৷
পাৰিজাত মু্খ্য বৃক্ষ সমস্ত৷৷৪৮৫৷৷
বহৱৈ বসন্ত মলয়া বাৱ৷
কোকিলে তেজে সুললিত ৰাৱ৷৷
সেহি বনমাজে গজেন্দ্ৰ আছে৷
অনেক হস্তী ফুৰৈ আগে পাছে৷৷৪৮৬৷৷
যতেক বৃক্ষ বেত বাংশ খৰি৷
ফুৰন্তে ভাঙ্গি নেয় মড়মড়ি৷৷
যাৰ গন্ধ পাইলে সিংহো পলায়৷
যতেক পশু ডৰে জীৱ যায়৷৷৪৮৭৷৷
মদ জল ধাৰা বহিয়া যায়৷
ভ্ৰমৰে তাক সেৱৈ সৰ্ব্বদায়৷৷
চৰন্তে ফুৰন্তে ক্রীড়ন্তে যাই৷
ৰহিলা গজেন্দ্ৰ ভাগৰ পাই৷৷৪৮৮৷৷
দুগুণে পীড়িল ৰবি কিৰণে৷
লড়িল দুনাই জলপান মনে৷৷
পৰ্ব্বত কাম্পৈ গজেন্দ্ৰৰ ভিৰে৷
পদ্মগন্ধ পাইল জলৰ তীৰে৷৷৪৮৯৷৷
নামিল গৈয়া সৰোৱৰ মাজে৷
চৌভিতি হস্তীসমে গজৰাজে৷৷
পদ্মৰ ধূলায়ে সুগন্ধি জল৷
পিলেক তৃষ্ণায়ে হুয়া বিকল৷৷৪৯০৷৷
অগাধ জল আতিশয় জুৰ৷
গজেন্দ্ৰ পাৰৈ ঘনে ঘনে বুৰ৷৷
হস্তিনী সমে কৰৈ জলক্রীড়া৷
খণ্ডিল সমস্তে ৰৌদ্ৰৰ পীড়া৷৷৪৯১৷৷
হস্তী হস্তিনীক কৰাৱৈ স্নান৷
পিয়াৱৈ জল গৃহস্থৰ ঠান৷৷
দায়ায়ে পুত্ৰ ভাৰ্য্যা সমে ৰঙ্গে৷
গৰ্ব্বে জলক্রীড়া কৰৈ মাতঙ্গে৷৷৪৯২৷৷
বিষয় সুখত ভৈলেক ভোল৷
নেদেখে মৃত্যু আসি পাইলে কোল৷৷
জলত গজেন্দ্ৰে ক্রীড়ৈ উল্লাসে৷
দেখিল তাক পাছে মহাগ্ৰাসে৷৷৪৯৩৷৷
ক্রোধে ধায়া আসি দিলে কামোৰ৷
সিবেলা দুহানো ভৈল আজোৰ৷৷
গজেন্দ্ৰক গ্ৰাহে আজুৰি টানে৷
হস্তীয়ো গ্ৰাহক আজুৰি আনে৷৷৪৯৪৷৷
যতেক বল আছে মানে দিল৷
গ্ৰাহ গজেন্দ্ৰৰ যুদ্ধ মিলিল৷৷
দুইৰো অদভূত যুদ্ধ দেখিত৷
ত্ৰিদশ দেৱ ভৈলা ভয়ে ভীত৷৷৪৯৫৷৷
দেখন্তে আতিশয় অসদৃশ৷
যুজন্তে সহস্ৰ গৈল বৰিষ৷৷
জগতে আছে এক দৃষ্টি কৰি৷
শুনা সভাসদ ঘুৰিও হৰি৷৷৪৯৬৷৷
৷৷ তৃতীয় কীৰ্ত্তন৷৷
ঘোষা৷৷
কৃষ্ণ ৰাম জয় জগবন্ধু জগন্নাথ৷
কৃষ্ণৰ চৰণে বন্দী ৰৌক মোৰ মাথ৷৷৪১৷৷
পদ৷৷
শুক নিগদতি কথা শুনা নৃপবৰ৷
মিলিল অদ্ভূত যুদ্ধ গ্ৰাহ গজেন্দ্ৰৰ৷৷
আকাশত দেৱগণে দেখন্ত বিস্ময়৷
গ্ৰাহ গজেন্দ্ৰৰ কাৰো নাহি ভঙ্গ জয়৷৷৪৯৭৷৷
কতো কালে গজেন্দ্ৰৰ বল ভৈল হানি৷
গ্ৰাহৰ বাঢ়িল বল পিয়া স্বাদ পানী৷৷
শ্ৰান্ত ভৈল গজৰাজ যুজিতে নপাৰে৷
চিহঁৰৈ হস্তিনীসৱে বেঢ়ি চাৰি পাৰে৷৷৪৯৮৷৷
আনো যত দন্তাল স্বামীৰ ঘোৰ দুঃখে৷
ৰাখিত নপাৰি কাৰো বাক্য নাসৈ মুখে৷৷
দেখিয়া গজেন্দ্ৰে আপুনাৰ মৃত্যু ভয়৷
ৰাখন্তা নাহিকে আৰ পুত্ৰ ভাৰ্য্যাচায়৷৷৪৯৯৷৷
সঙ্কট বেলাত তাৰ সদবুদ্ধি ভৈল৷
কি ভৈল কি ভৈল বুলি গুণিবাক লৈল৷৷
আমি হেন গজেন্দ্ৰ জগতে যাক কহে৷
মহাগৰ্বে ভ্ৰমন্তে পাইলেক জলগ্ৰাহে৷৷৫০০৷৷
সহস্ৰ বৎসৰ যিটো যুজো অপ্ৰয়াসে৷
জানিলোহো বন্দী ভৈলো বিধাতাৰ পাশে৷৷
আমাক ৰাখিৱে আৱে কমন বান্ধৱ৷
অন্তকালে গতি মোৰ কেৱলে মাধৱ৷৷৫০১৷৷
মহাবলৱন্ত কাল ভূজঙ্গক ভয়ে৷
যাক সেৱা কৰন্ত সদায়ে যোগীচয়ে৷৷
পলায় জগতৰে মৃত্যু যি প্ৰভুক ডৰে৷
যাক ভয়ে চন্দ্ৰ-সূৰ্য্য পৱন সঞ্চৰে৷৷৫০২৷৷
হেন জগন্নাথ অনাথৰ ইষ্টদেৱ৷
হৰি বিনে আৱৰ তাৰন্তা নাহি কেৱ৷৷
এহি বুলি মৰণত নভৈল বিকল৷
শুণ্ডে মেহাই ধৰিলন্ত সুৱৰ্ণ কমল৷৷৫০৩৷৷
পৰম আনন্দে মাধৱত দিয়া চিত্ত৷
গজেন্দ্ৰে কৰিলা স্তুতি আতি বিপৰীত৷৷
যাক শুনি তৰৈ সুখে ঘোৰ নৰকক৷
অন্তকালে পাই হেন মাধৱ বন্ধুক৷৷৫০৪৷৷
শুণ্ডে মেহাই পদ্মগোট উপৰক তুলি৷
গজেন্দ্ৰে শৰণ লৈলা ত্ৰাহি হৰি বুলি৷৷
শুনি শীঘ্ৰে চৰি হৰি গৰুড়ৰ স্কন্ধে৷
ভকতক ৰাখিবাক আসিলা প্ৰবন্ধে৷৷৫০৫৷৷
গৰুড়ৰ নামি হৰি পৰম বিক্রমে৷
শুণ্ডে ধৰি তৰক তুলিলা গ্ৰাহে সমে৷৷
চক্র ধৰি তেখনে ছিৰিলা গ্ৰাহ মুখ৷
হৰিৰ প্ৰসাদে গজেন্দ্ৰৰ গৈল দুখ৷৷৫০৬৷৷
হস্তী গুচি তৈতে চতুৰ্ভূজ ৰূপ ভৈলা৷
গলে বনমালা হাতে চাৰি অস্ত্ৰ লৈলা৷
কৰিলা প্ৰণাম পাছে দণ্ডৱতে পৰি৷
পাৰিষদ হুয়া বৈকুণ্ঠক গৈলা লড়ি৷৷৫০৭৷৷
কৃষ্ণ পৰশনে গ্ৰাহো শাপক নিস্তৰি৷
দিব্য ৰূপ ধৰিয়া স্বৰ্গক গৈলা লড়ি৷৷
শুনা কৃষ্ণ কথা জন্ম নকৰিও বৃথা৷
হৰিৰ চৰিত্ৰ আত নাহিকে অন্যথা৷৷৫০৮৷৷
দুৰ্ল্লভ মনুষ্য জন্ম পাইবা কত ভাগে৷
সত্বৰে সংসাৰ সিন্ধু তৰিবাক লাগে৷৷
যত দেখা ধন জন সৱে বিষ্ণুমায়া৷
আকাশত সঞ্চৰে মেঘৰ যেন ছায়া৷৫০৯৷৷
কৃষ্ণ কথা শ্ৰৱণ কীৰ্ত্তনে ভৱ তৰি৷
হেন জানি সদায়ে ঘুষিয়ো হৰি হৰি৷৷
কৃষ্ণৰ কিঙ্কৰে কহে শুনা সৰ্বলোক৷৷
বোলা হৰি হৰি সৱে পাতক চাড়োক৷৷৫১০৷৷
৷৷ গজেন্দ্ৰ উপাখ্যান সমাপ্ত৷৷৭৷৷