হুৰ হুৰ বতা চৰাই – ইন্দিৰা দিগন্ত গোস্বামী

চকুত চকু থৈ থৰ হোৱা পল এটি
খৰমৰণি এটা
বুকুৱেদি সৰকি যায়৷

পিতাইৰ টঙি ঘৰত
বেলি ডুবাৰ পৰত
সুঁহুৰি এটা বতাহত উটি আহে৷

ক’ৰ পৰা!?

ঝুমুৰৰ ছন্দত
জোনটিয়েও নাচে৷

চম্পাৱতীৰ তিৰ কঁপে জ্বৰ৷
সুঁহুৰিটোৱে
কাণৰ কাষত জোপোকা মাৰে৷

ধানো খাম চাউলো খাম৷
চম্পাৱতীক বিয়া কৰি ঘৰলৈ যাম৷

ইকাণ-সিকাণ টঙি ঘৰত
জীৱনৰ গান৷

আই মোৰ ভৰি কুটেকুটায়৷
আই মোৰ জোঁৱায়ে নেপূৰ পিন্ধায়৷

সতীয়া মাকৰ আনন্দত
চকুলোঁ ওলায়৷

টঙি ঘৰত নিজৰে জী
তামোল পাণ আয়তীৰ উৰুলি৷

চম্পাৱতীৰ দৰে মোৰো জী ৷

আই মোৰ ডিঙি কুটেকুটায়
আই মোৰ জোঁৱায়ে মণি পিন্ধায়৷

টোপনিৰ আমেজ
আইৰ চকুত জীৰ কপাল
ৰাজৰাণী৷

নিয়তিৰ পৰিহাস ৷

দিনৰ পোহৰ…

হুৰ হুৰ বতা চৰাই;
মোৰ ধান নাখাবি তোক দিম গোটা কৰাই৷

Subscribe
Notify of
0 Comments
Inline Feedbacks
View all comments
কপি নকৰিব, অনুগ্ৰহ কৰি লিংকটো বিলাই দিয়ক